प्रदेश नं २ मा उत्साहपूर्ण मतदान सुरु

काठमाडौं, असोज २

प्रदेश नं २ मा स्थानीय तह निर्वाचनको मतदान शुरु भएको छ । प्रदेश नं २ मा पर्ने ८ जिल्लामा बिहान ७ बजेबाट मतदान शुरु भएको हो । ती जिल्लामा पर्ने १ सय ३६ स्थानीय तहमा साँझ ५ बजेसम्म मतदानको समय तय गरिएको छ । निर्वाचनबाट प्रदेश नम्बर २ का स्थानीय तहबाट ६ हजार ६ सय २७ जना जनप्रतिनिधि चयन हुने छन् । मतदानका लागि अधिकांश मतदान केन्द्रहरुमा बिहानैदेखि मतदाताको लाम लागेको छ ।

दुई दशकपछि हुन थालेको स्थानीय निर्वाचनमार्फत् जनप्रतिनिधि चयन गर्न मतदाताहरु बिहान सबेरैदेखि लाम लागेका हुन् ।
यो प्रदेशका ८ जिल्लामा १ महानगरपालिका, ३ उपमहानगरपालिका, ७३ नगरपालिका र ५९ गाउँपालिका गरी १३६ स्थानीय तह छन् । मतदानबाट ६ हजार ६ सय २७ जनप्रतिनिधि चुनिने छन् । जसका लागि ३६ हजार ९ सय ९३ उम्मेद्वार मैदानमा छन् । प्रदेश नम्बर २ का ८ जिल्लामा २६ लाख ६४ हजार ९ सय ५० मतदाता छन् ।

मतदानका लागि २ हजार १ सय ६६ मतदान स्थल र ३ हजार ५ सय ७८ मतदान केन्द्र तोकिएका छन् । मतदानलाई शान्तिपूर्ण रुपमा सम्पन्न गर्न यी स्थानीय तहमा ७० हजारभन्दा बढी सुरक्षाकर्मी परिचालन गरिएको छ । त्यसैगरी निर्वाचन आयोगले ३१ हजार ५ सय कर्मचारी खटाएको छ ।

 

Leave a Reply

Your email address will not be published. Required fields are marked *