३३५ महिलाको उम्मेदवारी : दोस्रो चरणको निर्वाचन

काठमाडौँ । आगामी मंसिर २१ गते दोस्रो चरणमा हुने प्रतिनिधि सभा तथा प्रदेश सभा सदस्य निर्वाचनका लागि विभिन्न दल र स्वतन्त्र गरी कूल तीन सय ३५ महिलाले उम्मेदवारी दर्ता गराएका छन् । 

दोस्रो चरणका ४५ जिल्लामा पहिलो निर्वाचित हुने निर्वाचन प्रणालीका लागि बिहीबार प्रतिनिधि सभातर्फ एक २६ र प्रदेश सभातर्फ दुई सय ९ गरी कूल तीन सय ३५ महिलाले उम्मेदवारी मनोनयन दर्ता गराएको निर्वाचन आयोगले जनाएको छ ।

दोस्रो चरणमा ४५ जिल्लाका प्रतिनिधि सभातर्फ एक सय २८ निर्वाचन क्षेत्र र प्रदेश सभातर्फ दुई सय ५६ निर्वाचन क्षेत्रका लागि बिहीबार उम्मेदवारी दर्ताको व्यवस्था गरिएको थियो । निर्वाचन आयोगका अनुसार, प्रतिनिधि सभातर्फ एक हजार सात सय ४२ र प्रदेश सभातर्फ दुई हजार नौ सय ६६ गरी जम्मा चार हजार सात सय ८ जनाले उम्मेदवारी दर्ता गराएका छन् ।

पहिलो चरणमा मंसिर १० गते ३२ जिल्लामा हुने प्रतिनिधि सभा तथा प्रदेश सभा सदस्य निर्वाचनका लागि ४१ महिलाले उम्मेदवारी दिएका थिए । कात्तिक ५ गते भएको उम्मेदवारी मनोनयन दर्तामा प्रतिनिधि सभामा १८ र प्रदेश सभाका लागि २३ महिलाले उम्मेदवारी दिएका थिए । 
पहिलो चरणमा प्रतिनिधि सभातर्फ ३७ निर्वाचन क्षेत्र र प्रदेश सभातर्फ ७४ वटा निर्वाचन क्षेत्रका लागि प्रत्यक्षतर्फको निर्वाचन हुँदैछ । जनसंख्याअनुसार महिलाको प्रतिनिधित्व कम भएको भन्दै अन्तर पार्टी महिला सञ्जालले संविधानको भावनाअनुसार आसन्न प्रतिनिधि सभा र प्रदेश सभा सदस्यको निर्वाचनमा प्रतिनिधित्व सुनिश्चित हुनुपर्ने मागसहित दबाबमूलक कार्यक्रम गर्दै आएको छ ।

सञ्जालले स्थानीय तहमा न्यूनतम ५० प्रतिशत, प्रदेश सभामा न्यूनतम ४० प्रतिशत र प्रतिनिधि सभामा न्यूनतम एक तिहाइ महिलाको प्रतिनिधित्व सुनिश्चित गर्न माग गरेको सञ्जालका उपाध्यक्ष पुष्पा ठाकुरले जानकारी दिए ।

Leave a Reply

Your email address will not be published. Required fields are marked *