प्लास्टिकका माला प्रतिबन्ध भएपछि सयपत्री फूलको माग बढ्यो

समताखबर
  ७ कार्तिक २०७९, सोमबार १७:३०

कंचनपुर : सरकारले चाडपर्वलाई लक्षित गरेर प्लास्टिकको माला खरिद बिक्रीमा रोक लगाएपछि सयपत्री फूलको माग बढेको छ ।

तिहार सुरु भएसँगैै सयपत्री फूलको माग ह्वात्तै बढेको यहाँका फूल व्यवसायी जनक सिंहले बताए । उहाँले यस वर्ष सरकारले प्लास्टिकका मालामा प्रतिबन्ध लगाएपछि बाहिरी जिल्लाबाट समेत फूलको माग बढेको बताए । “विगतका वर्षहरुमा भन्दा अहिले फूलको माग धेरै छ ।” उहाँले भन्नुभयो, “सुदूरपश्चिमका पहाडी जिल्लाबाट समेत माग आउन थालेको छ हामीले मागअनुसार दिन सकिरहेका छैनौँ ।” उहाँले नेपालगञ्ज, दाङ, कैलालीलगायतका जिल्लाबाट समेत फूलको माग बढेको बताए । “यस वर्ष हावापानीका कारणले फूल ढिलो गरी फूलेको छ ।” उहाँले भन्नुभयो, “बजार माग धान्नै नसकिने अवस्था छ सोचे अनुसारको फूल फुलेन ।”

उहाँले हालसम्म रु पाँच सय प्रतिकिलोका र मालाको रु सयका दरले सयपत्री बिक्री गरिरहेको बताए । कञ्चनपुरको भीमदत्त नगरपालिका–८ तिलाचौरमा दुई बिघा जमिन लिजमा लिएर उहाँले सयपत्री फूलको खेती गर्नुभएको छ । “अहिले भारतबाट ठूलो मात्रामा फूल आयात भइरहेको छ हाम्रो यहाँ उत्पादन छैन ।” उहाँले भन्नुभयो, “अहिले तिहारलाई लक्षित गरेर फूल उत्पादन गरेका छौँ अब यसलाई नियमित गरेर बाह्रै महिना उत्पादन गर्ने तयारीमा छु ।”

यहाँका व्यवसायी दिनेश पन्तले अहिले ग्राहकले पनि सयपत्री फूल खोजिरहेको बताए । “यहाँ फूल प्रशस्त छैन भारतकै भर पर्नु परेको छ ।” उहाँले भन्नुभयो, “अहिले ग्राहकले प्लास्टिकको माला योग गर्न रुचाउँदैनन् सयपत्री नै खोज्ने गरेका छन् ।” कञ्चनपुर उद्योग वाणिज्य सङ्घले पनि सूचना जारी गर्दै व्यवसायीलाई प्लास्टिकको माला बिक्री वितरण नगर्न आग्रह गरेको छ ।

जिल्ला प्रशासन कार्यालय कञ्चनपुरले पनि व्यवसायीलाई प्लाष्टिकका माला बिक्री वितरण नगर्न आग्रह गरेको छ । प्रमुख जिल्ला अधिकारी गोपाल प्रसाद अर्यालले उद्योग वाणिज्य संघ मार्फत व्यवसायीलाई बिक्री वितरण नगर्न निर्देशन दिएको बताए । “हामीले माइकिङ पनि गरिरहेका छौ व्यवसायीलाई बिक्री नर्गन निर्देशन दिएका छौँ ।” उहाँले भन्नुभयो, “अनुगमनका क्रममा बिक्री वितरण गरिएको भेटिए सामग्री जफत गछौं।”

Leave a Reply

Your email address will not be published. Required fields are marked *