सुदूरपश्चिम प्रदेश सरकारले कहिले पूर्णता पाउँछ ?

समताखबर
  २१ चैत्र २०७९, मंगलवार १९:०४

धनगढी । सुदूरपश्चिमका मुख्यमन्त्री कमलबहादुर शाहको नेतृत्वमा गत माघमा गठन भएको मन्त्रिपरिषद्ले अझै पूर्णता पाउन सकेको छैन ।

मन्त्रीमण्डल विस्तारमा भइरहेको ढिलाइले सरकारको नीतिगत काम प्रभावित हुनुका साथै अन्य काम कारबाहीमा समेत प्रभावकारिता देखिएको छैन । मुख्यमन्त्रीसँगै भौतिक पूर्वाधारमन्त्री र आर्थिक मामिलामन्त्रीबाहेक अन्य मन्त्रालय नेतृत्वविहीन बनेका छन् ।

सत्तापक्ष दलबीच मन्त्रालय भागबण्डाका विषयमा समझदारी बन्न सकेको छैन । सबै दल केन्द्रीय नेतृत्वको निर्णयको पर्खाइमा छन् । “मन्त्रालय लामो समयदेखि नेतृत्वविहीन बन्दा नीतिगत काम प्रभावित छन् ”, एक मन्त्रालयका कर्मचारीले भने ।

प्रदेशसभामा कांग्रेस संसदीय दलका नेता शाह नेपालको संविधानको धारा १६८ को (३) बमोजिम गत माघ २७ गते प्रदेशको मुख्यमन्त्रीमा नियुक्त भएका थिए । संवैधानिक व्यवस्थाअनुसार उनले प्रदेशसभाबाट विश्वासको मत भने यसअघि नै पाइसकेका छन् ।

केन्द्रमा फेरिएको दलको समीकरणसँगै मुख्यमन्त्री शाहले प्रदेशसभाबाट सजिलैसँग विश्वासको मत पाएका थिए । उनले फेरिएको राजनीतिक समीकरणका कारण मन्त्रीमण्डल विस्तारमा ढिलाइ भएको बताए । मुख्यमन्त्री शाहले भने “केन्द्रमा दलका शीर्ष नेताबीच छलफल र सहमतिपछि अब हप्ता, १० दिनभित्रै मन्त्रीमण्डल विस्तार हुन्छ ।”

सत्तापक्ष नेकपा (माओवादी केन्द्र)ले प्रदेश सरकारको नेतृत्व आधा कार्यकाल आफूलाई दिनुपर्ने अडान राख्दै आएको छ । सो पार्टीका संसदीय दलका नेता खगराज भट्टले सरकारको नेतृत्व आलोपालो गर्नुपर्ने बताएका छन् ।

प्रदेश सरकारमा माओवादी केन्द्रले तीन मन्त्रालयको माग गरेको छ । सत्तापक्ष अर्को दल नागरिक उन्मुक्ति पार्टीले पनि महत्वपूर्ण मन्त्रालयमा दाबी गरिरहेको छ । दलले महत्वपूर्ण मन्त्रालय दाबी गरिरहँदा मन्त्रालय बाँडफाँटमा सहमति जुट्न सकेको छैन ।

प्रदेश सरकारको भौतिक पूर्वाधार विकास मन्त्रालय कांग्रेसकै प्रकाशबहादुर देउवा र आर्थिक मामिला मन्त्रालय नेकपा (एकीकृत समाजवादी) का नरेशकुमार शाहीले समालेका छन् ।

Leave a Reply

Your email address will not be published. Required fields are marked *