कार्यालयकाे छतबाट खसेर प्रहरीको मृत्यु

धनगढी : इलाका प्रहरी कार्यालय टीकापुरको निर्माणाधीन भवनको छतबाट खसेर उपचारका क्रममा प्रहरी जवान सन्देश चदाराको मृत्यु भएको छ । याे घटनालाई लिएर छानबिनका लागि समिति गठन गरिएको छ ।

जिल्ला प्रहरी कार्यालय कैलालीका प्रहरी नायब उपरीक्षक (डीएसपी) योगेन्द्र तिमिल्सिनाको नेतृत्वमा पाँच सदस्यीय छानबिन समिति गठन गरिएको कैलालीका प्रमुख प्रहरी उपरीक्षक (एसपी) नरेन्द्र चन्दले जानकारी दिए ।

प्रहरीका अनुसार साेमबार राति करिब ११ बजेतिर चदारा छतबाट खसेका थिए । उनलाई तत्काल टीकापुर प्रादेशिक अस्पताल लगिएको भए पनि उपचारकै क्रममा मृत्यु भएको थियो । घटना हुँदा उनी कार्यालयभित्र ड्युटीमै रहेको बुझिएकाे छ । शव परीक्षणका लागि अस्पतालमै राखिएको छ ।

मृतक प्रहरीका आफन्तले घटना शंकास्पद भएको बताउँदै छानविनकाे माग गरेका छन । उनीहरूले निस्पक्षे छानबिन गर्न माग गर्दै हाल शव परीक्षण गर्न नदिने बताएका छन् ।
साथै, कार्यालय परिसरको सीसीटीभी फुटेज सार्वजनिक गर्न पनि माग गरेका छन् ।