भोटेकोशी बाढी : ५ हजारभन्दा बढी अझै सम्पर्कविहीन

काठमाडौं । भदौ १० गते विहान रसुवाको भोटेकोशी नदीमा आएको विनाशकारी बाढीपछि रसुवा जिल्लाबाट मात्रै २ हजार ८६० जना सम्पर्कविहीन रहेको पाइएको छ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणको पछिल्लो विवरणअनुसार बाढी प्रभावित विभिन्न क्षेत्रबाट कुल ५ हजार ३२६ जना सम्पर्कविहीन छन्। रसुवाका सम्पर्कविहीनमध्ये १ हजार ३९३ जना स्थानीय बासिन्दा र १ हजार २८६ जना अन्य जिल्लाबाट त्यहाँ पुगेका व्यक्ति छन्।

त्यस्तै, जिल्लामा कार्यरत ७३ सरकारी कर्मचारी, ४५ नेपाली सेना, २५ नेपाल प्रहरी र १२ सशस्त्र प्रहरी पनि सम्पर्कविहीन रहेको प्राधिकरणले जनाएको छ। बैंक तथा वित्तीय संस्थामा कार्यरत २६ जनाको समेत अवस्था अज्ञात छ।

नुवाकोटबाट १ हजार ९८१ जना सम्पर्कविहीन छन् भने बाढीमा परेका ५८७ विदेशी पर्यटकको समेत खोजी भइरहेको छ।

सम्पर्कविहीनहरूको खोजी तथा उद्धार कार्य नेपाली र विदेशी टोलीको संयुक्त प्रयासमा जारी छ। प्राधिकरणका अनुसार हालसम्म १ हजार ३५७ शव फेला परेका छन्। तीमध्ये १०२ शव परिवारलाई बुझाइएको छ भने बाँकीको पहिचान खुल्न सकेको छैन।

बाढीपछि ठूलो संख्यामा मानिस अझै सम्पर्कबाहिर रहेकाले खोजी तथा शव पहिचानको चुनौती थप जटिल बनेको छ।