धनुषाका ३८५ परिवारले पाए जग्गाधनी पुर्जा

काठमाडौं । धनुषाको सबैला नगरपालिका–८, साविक ठिल्ला गाउँ विकास समिति क्षेत्रमा बसोबास गर्दै आएका ३८५ परिवारले लामो प्रतीक्षापछि जग्गाधनी पुर्जा पाएका छन्।

नापी कार्यालय धनुषाले नापजाँच सम्पन्न भएको करिब पाँच वर्षपछि उनीहरूलाई जग्गाधनी पुर्जा वितरण गरेको हो। वर्षौंदेखि स्ववासीका रूपमा बस्दै आएका परिवारले पुर्जा पाएसँगै आफ्नो बसोबास रहेको जग्गामाथि कानुनी स्वामित्व प्राप्त गरेका छन्।

नापजाँचको काम सकिए पनि जग्गा दर्ताका लागि आवश्यक प्रक्रियामा स्थानीयको सहभागिता न्यून भएपछि पुर्जा वितरणमा ढिलाइ भएको बताइएको छ। आवश्यक प्रक्रिया पूरा गरी हाल ३८५ थान पुर्जा वितरण गरिएको हो।

यसअघि सबैला नगरपालिकाका वडा नम्बर ४, ५, ६ र १० मा ३ हजार २२६ परिवारलाई जग्गाधनी पुर्जा वितरण भइसकेको छ।