भरत दाहाललाई थुनामुक्त गर्न सर्वोच्चको आदेश

काठमाडौं । सर्वोच्च अदालतले राजनीतिक विश्लेषक भरत दाहाललाई थुनामुक्त गर्न आदेश दिएको छ।

दाहालकी छोरी डेनी दाहालले दायर गरेको बन्दी प्रत्यक्षीकरणसम्बन्धी रिटमा सुनुवाइ गर्दै न्यायाधीशद्वय कुमार रेग्मी र सुनिल पोखरेलको संयुक्त इजलासले रिट जारी गरेको हो।

अदालतले दाहाललाई निरन्तर हिरासतमा राख्नुपर्ने पर्याप्त आधार र कारण नदेखिएको भन्दै बिहीबारकै मितिदेखि तारेखमा राखेर रिहा गर्न आदेश दिएको छ।

सर्वोच्चको आदेशमा दाहालले संविधान तथा कानुनविपरीत हिंसात्मक आन्दोलनका लागि आह्वान गरेको नदेखिएको उल्लेख छ। काठमाडौं जिल्ला अदालतले यसअघि तीन दिनको म्याद थप्दा बयानलगायतका प्रक्रिया पूरा गर्नुपर्ने कारण देखाएको थियो। तर, दाहालको बयान ६ गते नै सकिएको तथ्य सर्वोच्चले औँल्याएको छ।

‘ग्रे जोन’सम्बन्धी रिपोर्टबारे सामाजिक सञ्जालमा धारणा सार्वजनिक गरेको आरोपमा दाहाललाई साइबर अपराधको कसुरमा असोज ४ गते मोरङको बेलबारीबाट पक्राउ गरिएको थियो।