कैलाली–५ मा 'प्रेम आले' को लहर बढ्दै

कैलाली । कैलाली निर्वाचन क्षेत्र नम्बर ५ मा नेपाली कम्युनिस्ट पार्टी (नेकपा) का उम्मेदवार ‘प्रेमबहादुर आले’ को चुनावी लहर दिनप्रतिदिन बढ्दै गएको देखिएको छ ।

घरदैलो भेटघाट, टोलसभा तथा अन्तरक्रिया कार्यक्रममार्फत मतदातासँग प्रत्यक्ष संवाद गरिरहेका आलेले विकास, रोजगारी र जनजीविकाका मुद्दालाई प्राथमिकतामा राख्दै अभियान तीव्र बनाएका छन् ।

पछिल्ला दिनमा धनगढी उपमहानगरपालिका तथा ग्रामीण भेगका विभिन्न वडामा आयोजित भेटघाट कार्यक्रममा स्थानीय बासिन्दाको उल्लेख्य सहभागिता देखिएको छ ।

सडक स्तरोन्नति, खानेपानी, स्वास्थ्य सेवा विस्तार, युवा रोजगारी र कृषि क्षेत्रको आधुनिकीकरण जस्ता विषयमा मतदाताले राखेका मागप्रति उनले सकारात्मक प्रतिबद्धता व्यक्त गरेका छन् ।

स्थानीय युवाहरूले रोजगारी सिर्जना र सीपमूलक तालिम सञ्चालनमा जोड दिन आग्रह गरेका छन् भने महिला समूहहरूले स्वास्थ्य सेवा र सशक्तीकरणका कार्यक्रमलाई प्राथमिकता दिन माग गरेका छन् । आलेले जनताको आवश्यकता र सुझावलाई आफ्नो चुनावी घोषणापत्रमा समेट्ने प्रतिबद्धता जनाएका छन् ।

राजनीतिक विश्लेषकहरूका अनुसार कैलाली–५ मा प्रतिस्पर्धा कडा रहे पनि पछिल्ला कार्यक्रमहरूमा देखिएको जनसहभागिताले आलेको पक्षमा माहोल बन्दै गएको संकेत गरेको छ ।

निर्वाचन नजिकिँदै जाँदा क्षेत्रको चुनावी सरगर्मी अझ बढ्ने अपेक्षा गरिएको छ।