किशोर श्रेष्ठलाई पक्राउ गर्ने प्रहरीको प्रयास अदालतबाटै रोकियो

काठमाडौं । पत्रकार किशोर श्रेष्ठलाई पक्राउ गर्न जिल्ला अदालत, ललितपुरले अनुमति दिन अस्वीकार गरेको छ।

उपसभामुख रुवीकुमारी ठाकुरले दिएको उजुरीका आधारमा जिल्ला प्रहरी कार्यालय, ललितपुरको टोली सोमबार श्रेष्ठविरुद्ध पक्राउ पूर्जी माग गर्दै अदालत पुगेको थियो। तर, अदालतले पक्राउ पूर्जी जारी नगर्ने निर्णय गरेको हो।

उपसभामुख ठाकुरले सोमबार श्रेष्ठविरुद्ध जिल्ला प्रहरी परिसर, ललितपुरमा जाहेरी दर्ता गराएकी थिइन्। जनआस्थाको फेसबुक पेज तथा अनलाइनमार्फत आफ्नो व्यक्तिगत तस्बिर, मर्यादा र संवैधानिक हैसियतमा आँच पुग्ने गरी भ्रामक तथा असत्य सामग्री प्रकाशित गरिएको उनको आरोप छ।

ठाकुरले प्रकाशित सामग्रीले आफ्नो व्यक्तिगत, पारिवारिक र सामाजिक जीवनमा गम्भीर असर पारेको जाहेरीमा उल्लेख गरेकी छन्। समाचारमा जोडिएका पुरुष आफूले रक्षाबन्धन बाँधेका दाजु भएको उनको दाबी छ। ती व्यक्तिसँग अनैतिक सम्बन्ध रहेको आशयमा समाचार प्रकाशित गरी आफ्नो चरित्र तथा प्रतिष्ठामा आँच पुर्‍याउने प्रयास भएको उनले आरोप लगाएकी छन्।

यसअघि पनि अर्की युवतीसँग राष्ट्रिय स्वतन्त्र पार्टीका एक सांसदलाई जोडेर प्रकाशित सामग्रीको विषयमा श्रेष्ठ पक्राउ परेका थिए। वैयक्तिक गोपनीयता हननसम्बन्धी आरोपमा पक्राउ परेका श्रेष्ठलाई सोमबार नै सर्वोच्च अदालतले रिहा गर्न आदेश दिएको थियो।

त्यसको केही समयमै अर्को उजुरीका आधारमा पक्राउ पूर्जी लिन प्रहरी अदालत पुगे पनि ललितपुर जिल्ला अदालतबाट अनुमति नपाएको हो।