बीपी राजमार्गमा चार दिन राति सवारी बन्द

काठमाडौं । सम्भावित बाढीपहिरोको जोखिमलाई मध्यनजर गर्दै बीपी राजमार्गको काभ्रे खण्डमा चार दिन रातिको समयमा सवारी आवागमन बन्द गरिने भएको छ।

मनसुन प्रतिकार्य कमाण्ड पोष्ट काभ्रेको बैठकले असोज ८ गतेदेखि ११ गतेसम्म बेलुकी ५ बजेदेखि बिहान ५ बजेसम्म सवारी सञ्चालनमा रोक लगाउने निर्णय गरेको हो। प्रमुख जिल्ला अधिकारी गोपालकुमार अधिकारीका अनुसार उक्त अवधिमा ठूलो वर्षाको पूर्वानुमान रहेकाले जोखिम न्यूनीकरणका लागि यस्तो निर्णय गरिएको हो।

वर्षा र बाढीको अवस्था हेरेर दिनको समयमा समेत सवारी रोक्नुपर्ने अवस्था आए जिल्ला प्रहरी कार्यालय काभ्रेले आवश्यक निर्णय गर्न सक्ने व्यवस्था गरिएको छ। निर्णय कार्यान्वयनमा सहजीकरण गर्न सिन्धुली र भक्तपुर प्रशासनसँग समेत समन्वय गरिने जनाइएको छ।

बैठकले नदी किनार र पहिरोको जोखिममा रहेका बस्तीलाई पूर्वसूचनामार्फत सचेत गराउने तथा उद्धार टोलीलाई विभिन्न स्थानमा तयारी अवस्थामा राख्ने निर्णय गरेको छ। नेपाली सेना, नेपाल प्रहरी र सशस्त्र प्रहरीलाई आवश्यक उद्धार तथा समन्वयका लागि तयारी अवस्थामा रहन निर्देशन दिइएको छ।

प्रशासनले जोखिमयुक्त क्षेत्रमा अनावश्यक आवागमन नगर्न र मौसम तथा विपद्सम्बन्धी पूर्वसूचनालाई गम्भीरतापूर्वक लिन सर्वसाधारणलाई आग्रह गरेको छ।