उपत्यकाका नदीमा ठुलो बाढी, करिडोर क्षेत्रमा जोखिम

काठमाडौं । लगातारको वर्षासँगै काठमाडौं उपत्यकाका प्रमुख नदी तथा खोलामा जलसतह बढेर बाढी आएको छ।

बागमती, मनोहरा, हनुमन्ते, विष्णुमती र नख्खुसहितका नदी तथा खोलामा पानीको बहाव बढेपछि आसपासका क्षेत्रमा जोखिम बढेको हो।

नदीको जलसतह बढेपछि सुरक्षाकर्मीले करिडोर सडकमा माइकिङ गर्दै सर्वसाधारणलाई सावधानी अपनाउन आग्रह गरिरहेका छन्। जोखिम बढेका केही सडकखण्डमा आवागमनसमेत रोकिएको छ।

बाढी महाशाखाका अनुसार आज काठमाडौंसहित देशका अधिकांश स्थानका नदी तथा खोलामा पानीको बहाव बढ्ने र बाढीको जोखिम उच्च रहने सम्भावना छ।

उपत्यकामा बिहीबार दिउँसोदेखि निरन्तर वर्षा भइरहेकाले नदी किनार तथा तल्लो भेगमा थप सतर्कता अपनाउन आग्रह गरिएको छ।