ढुङ्गाले थिचेर वृद्धाको मृत्यु

म्याग्दी । म्याग्दीको अन्नपूर्ण गाउँपालिका, ४ गाडपार भन्ने स्थानमा पहिरोमा परि एक वृद्धाको मृत्यु भएको छ । बुधबार बिहान ११.३० बजे बस्ती पछाडीको भीरबाट खसेको पहिरोबाट उछिट्टीएको ढुङ्गा घरमा खसेपछि स्थानीय ७२ वर्षीया सीता फगामीको घट्नास्थलमै मृत्यु भएको प्रहरीले जनाएको छ ।

घरमा श्रीमान–श्रीमती मात्र रहेको बेला घर पछाडि रहेको भीर भत्केर पहिरो खसेको थियो । ठूलो पहिरो खस्नुअघि स–साना ढुङ्गाहरु निरन्तर झरेपछि कालीगण्डकी पारी दानाबासीले सुसेल्दै, चिच्याउँदै पहिरो खस्न लागेको जनाउ दिएका थिए ।

‘बस्ती पछाडिको भीरबाट पहिरो झर्न लागेको हामीले जानकारी दिँदा दिँदै र पहिरो छेउका मान्छेहरु भाग्दाभाग्दै एक बृद्ध पहिरोमा परिहाल्नु भो’ छिमेकी बस्ती अन्नपूर्ण गापा, ३ दानाका इन्द्रसिं शेरचनले भने, ‘घरमा वृद्धवृद्धा मात्र भएको र बुढ्यौली उमेरमा भाग्न नसक्दा मानवीय क्षति हुन पुग्यो ।’