हेलिकोप्टरमा राहत बोकेर उत्तरगया पुग्यो रेडक्रसको टोली

काठमाडौं । भोटेकोशी नदीमा आएको बाढीका कारण सडक सम्पर्क टुटेको रसुवाको उत्तरगया गाउँपालिका–२ मा नेपाल रेडक्रस सोसाइटीले हेलिकोप्टरमार्फत राहत सामग्री पुर्‍याएको छ।

सडक सञ्जाल पुनः सञ्चालन हुन नसकेको क्षेत्रमा रेडक्रसले अत्यावश्यक खाद्य सामग्री पुर्‍याएर ६० घरधुरीलाई वितरण गरेको हो। भदौ १० गते आएको बाढीपछि उक्त क्षेत्र सडकमार्फत अन्य स्थानसँग जोडिन सकेको छैन।

रेडक्रस तथा रेडक्रिसेन्ट सोसाइटीहरूको अन्तर्राष्ट्रिय महासंघ (आईएफआरसी) को सहयोगमा प्रभावित परिवारलाई खाद्य सामग्री उपलब्ध गराइएको नेपाल रेडक्रसले जनाएको छ।

रेडक्रसका अध्यक्ष डा.विशालकुमार भण्डारीसहित स्वयंसेवकको टोलीले स्थानीयलाई राहत वितरण गरेको थियो। अध्यक्ष भण्डारीले बाढीपछि उत्पन्न विपद्मा रेडक्रसका स्वयंसेवक तत्काल प्रतिकार्यका लागि निरन्तर खटिरहेको बताए।

उनका अनुसार रसुवा, नुवाकोट र धादिङका अतिप्रभावित क्षेत्रमा खोज तथा उद्धारसँगै राहत वितरणमा स्वयंसेवकले समन्वय र सहजीकरण गरिरहेका छन्। प्रभावित क्षेत्रमा आवश्यकताका आधारमा राहत वितरणलाई निरन्तरता दिइने रेडक्रसले जनाएको छ।