आमालाई ६ महिना तलबी प्रसूति बिदा दिने गरी कानून संशोधनको तयारी

काठमाडौं । सरकारले महिलालाई ६ महिनासम्म तलबसहितको प्रसूति बिदा उपलब्ध गराउने व्यवस्था गर्न कानून संशोधनको प्रक्रिया अघि बढाएको छ।

कानूनमन्त्री सोबिता गौतमका अनुसार सुरक्षित मातृत्व तथा प्रजनन स्वास्थ्य अधिकार ऐन, २०७५ संशोधनका लागि विधेयकको मस्यौदा तयार भइसकेको छ। प्रस्तावित व्यवस्थामा आमालाई कम्तीमा ६ महिनाको तलबी प्रसूति बिदा र बच्चाको स्याहारमा सहयोग गर्न बाबुलाई ४२ दिनसम्म तलबी बिदा दिने उल्लेख छ।

मस्यौदालाई मन्त्रिपरिषद्बाट स्वीकृत गराएर संसदमा पेस गर्ने तयारी भइरहेको मन्त्री गौतमले जानकारी दिएकी छन्।