खोज, उद्धार र राहतका सामग्रीमा कर छुट तथा व्यवस्थापनबारे छलफल

काठमाडौं । मनसुन प्रतिकार्य कमाण्ड पोष्टको आज बिहीबार बसेको बैठकमा मित्रराष्ट्र, विभिन्न निकाय तथा संस्थाबाट प्राप्त हुने खोज, उद्धार र राहत सामग्रीमा कर छुट तथा ती सामग्रीको व्यवस्थापनबारे छलफल भएको छ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणमा बसेको बैठकमा विपद् प्रभावित क्षेत्रमा आवश्यक सामग्री सहज रूपमा उपलब्ध गराउने तथा प्राप्त सामग्रीको प्रभावकारी व्यवस्थापन गर्ने विषयमा कुराकानी भएको प्राधिकरण प्रमुख कार्यकारी अधिकृत डा.धर्मराज उप्रेतीले बताए ।

यसैगरी, रसुवा–भोटेकोशी बाढीपछिको खोज, उद्धार तथा राहत कार्यको समन्वयका लागि गठित परिचालन टोलीको बैठकसमेत बसेको छ। उक्त बैठकमा राहत वितरण तथा शीघ्र पुनर्स्थापनाका लागि भइरहेको कामको प्रगति अवस्थाबारे समीक्षा गरिएको छ।

बाढी प्रभावित क्षेत्रमा राहत तथा पुनर्स्थापनाका कामलाई थप प्रभावकारी बनाउने विषयमा पनि बैठकमा छलफल भएको जनाइएको छ।