गृहमन्त्रीकाे बचन-‘दोषी उम्किन दिँदैनौं’

काठमाडौं । तीन वर्षीया गरिमा चौधरीको हत्या प्रकरणलाई लिएर गृहमन्त्री सुधन गुरूङले नागरिकको खबरदारी आवश्यक भए पनि अनुसन्धान प्रक्रियालाई स्वतन्त्र रूपमा अघि बढ्न दिन आग्रह गरेका छन् ।

गृहमन्त्री गुरूङले सामाजिक सञ्जालमार्फत सरकारका कामकारबाहीमाथि प्रश्न उठाउने, कमजोरी औंल्याउने र सरकारलाई जवाफदेही बनाउने अधिकार नागरिकसँग रहेको बताएका छन् । तर, घटनाको अनुसन्धानमा अनावश्यक हस्तक्षेप नगर्न उनले आग्रह गरेका हुन् ।

उनले सरकारको उद्देश्य गरिमा हत्या प्रकरणमा संलग्न दोषीलाई कानुनी कारबाही गराउनुमा मात्र सीमित नरहेको उल्लेख गरेका छन् । आगामी दिनमा कुनै पनि बालिका असुरक्षित हुन नपर्ने वातावरण निर्माण गर्नु सरकारको प्राथमिकता रहेको उनको भनाइ छ ।

गुरूङले घटनामा कानूनले व्यवस्था गरेको अधिकतम न्याय सुनिश्चित गर्ने प्रतिबद्धता व्यक्त गर्दै भविष्यमा यस्ता अपराध दोहोरिन नदिन कानुनी तथा संस्थागत संयन्त्रलाई थप प्रभावकारी बनाउने बताएका छन् ।

उनले नागरिकको आक्रोशलाई न्याय प्राप्तिको अभियानमा रूपान्तरण गर्नुपर्नेमा जोड दिएका छन् । ‘आक्रोशलाई न्यायको शक्तिमा बदलौं, गरिमालाई न्याय दिलाऔं,’ उनले भनेका छन्, ‘हरेक छोरीका लागि सुरक्षित नेपाल बनाऔं ।’

गरिमा हत्या घटनालाई सरकारले गम्भीर र संवेदनशील रूपमा लिएको उल्लेख गर्दै गृहमन्त्री गुरूङले विगतका अनुसन्धानबाट देखिएका कमजोरी र अनुभवलाई समेत ध्यानमा राखेर अनुसन्धान अघि बढाइएको बताएका छन् ।