भारतको उत्तराखण्ड बाढीमा जाजरकोटका १३ जना बेपत्ता, खोजीका लागि गाउँपालिकाको आग्रह

काठमाडौं । भारतको उत्तराखण्ड राज्यको उत्तरकाशी जिल्लास्थित हर्षिल क्षेत्रमा साउन २० गते आएको विनाशकारी वर्षा र बाढीका कारण जाजरकोट जिल्लाको कुशे गाउँपालिका–२ का करिब १३ जना नेपाली नागरिक बेपत्ता भएका आशंका गरिएको छ।

कुशे गाउँपालिकाले बिहीबार एक विज्ञप्ति जारी गर्दै उक्त वडाका १३ जना र अन्य वडाका समेत केही व्यक्ति सम्पर्कविहीन रहेको जानकारी प्राप्त भएको बताएको छ। घटनासँग सम्बन्धित विवरण सामाजिक सञ्जालमार्फत आएको जानकारीमा आधारित छ।

गाउँपालिका अध्यक्ष हरिचन्द्र बस्नेतद्वारा जारी विज्ञप्तिमा हराइरहेका नेपालीहरूको खोजी तथा उद्धार कार्यलाई छिटो र प्रभावकारी बनाउन नेपाल सरकार र परराष्ट्र मन्त्रालयलाई कूटनीतिक पहलका लागि अनुरोध गरिएको छ। यस्तै, प्रदेश तथा संघीय सरकारको ध्यानाकर्षण पनि गराइएको छ।

यसैबीच, सामाजिक सञ्जालमा बर्दियाका ४ जना नेपालीसमेत सोही बाढीपछि सम्पर्कविहीन भएको बताइएको छ, जसका कारण उनीहरू पनि हराएको हुन सक्ने अनुमान गरिएको छ।