बालेनले सुकुम्वासी बस्तिमा डोजर आतंक मच्चाए : नारायणकाजी

काठमाडौं । नेपाली कम्युनिस्ट पार्टीका नेता तथा पूर्व गृहमन्त्री नारायणकाजी श्रेष्ठले सरकारले देशभर सुकुम्वासी बस्तीमा चलाएको डोजर अभियानलाई ‘दमनकारी’ र ‘जनविरोधी’ भन्दै कडा आलोचना गरेका छन् ।

उनले सुकुम्वासीमाथि गरिएको व्यवहार गैरजिम्मेवार, अपमानजनक र अमानवीय भएको आरोप लगाउँदै यस्तो कार्य तत्काल बन्द गर्न माग गरेका छन् । श्रेष्ठका अनुसार सुकुम्वासी पनि नेपाली नागरिक भएकाले उनीहरूलाई सम्मानजनक रूपमा बाँच्ने र बसोबास गर्ने अधिकार सुनिश्चित हुनुपर्छ ।

‘संविधानले सबै नागरिकलाई आवासको हक दिएको छ । आफ्नो देशमै जमिन नभएकै कारणले आवासविहीन र अपमानित हुनु पर्ने अवस्था स्वीकार्य हुन सक्दैन,’ उनले भने ।

श्रेष्ठले सुकुम्वासी समस्या समाधान गर्दा व्यवस्थित र वैज्ञानिक ढङ्गले अघि बढ्नुपर्नेमा जोड दिएका छन् । उनका अनुसार वास्तविक सुकुम्वासीलाई वैकल्पिक बसोबासको व्यवस्था नगरी बलपूर्वक हटाउनु अन्यायपूर्ण हुन्छ भने नक्कली सुकुम्वासीलाई भने कानुनी प्रक्रियाबाट हटाउन सकिन्छ ।

उनले वर्तमान सरकार र काठमाडौं महानगरपालिकाका प्रमुख बालेन्द्र शाहको कार्यशैलीप्रति असहमति जनाउँदै विगतमा आफूसँग भएको छलफलसमेत स्मरण गरे । ‘उहाँ सुरक्षा बल पठाइदिनुस्, म बस्ती हटाउँछु भन्नुहुन्थ्यो । मैले भने पहिले वास्तविक र नक्कली सुकुम्वासी छुट्याएर तथ्यांक तयार गरौँ र वैकल्पिक व्यवस्था गरौँ भनेको थिएँ,’ श्रेष्ठले भने ।

उनले अहिले सरकारले पनि उही ‘गलत बाटो’ अपनाएको आरोप लगाउँदै सुकुम्वासीलाई नागरिक नै नठान्ने दृष्टिकोण त्याग्न आग्रह गरे ।

श्रेष्ठले दीर्घकालीन समाधानका लागि तीन बुँदे सुझावसमेत अघि सारेका छन् । जसमा वास्तविक सुकुम्वासीको पहिचान, व्यवस्थित पुनर्वास योजना र वैज्ञानिक तथा सम्मानजनक व्यवस्थापन प्रमुख रहेका छन् ।

‘सुकुम्वासीलाई बेघर बनाउने, त्रसित बनाउने र अपमानित गर्ने कार्य कुनै पनि हालतमा स्वीकार्य हुँदैन,’ उनले भने ।