धरानमा सुकुमबासीको प्रदर्शनमा दलहरूको समर्थन

विराटनगर। काठमाडौँका र भक्तपुरका खोला किनारका सुकुमबासी बस्ती हटाइएको विरोधमा सुनसरीको धरानमा प्रदर्शन गरिएको छ।

धरानको छाता चोकबाट सुरु भएको र्‍याली बजार परिक्रमा गरिएको थियो। नेपाल बसोबास बस्ती संरक्षण समाज र बस्ती रक्षा संरक्षण परिचालन समितिको अगुवाइमा भएको प्रदर्शनमा सुकुमबासीहरूले उचित पुनर्वास बिना डोजर चलाइएको भन्दै विरोध जनाएका छन्।

प्रदर्शनमा सहभागीहरूले संविधानले सुनिश्चित गरेको आवासको हक कार्यान्वयन गर्न सरकारसँग माग गरेका छन्। समाजका केन्द्रीय अध्यक्ष कुमार कार्कीले सुकुमबासीमाथि अमानवीय व्यवहार भएको आरोप लगाउँदै तत्काल दमन रोक्न आग्रह गरे।

प्रदर्शनमा हजारौँ सुकुमबासीको सहभागिता रहेको थियो भने धरानका विभिन्न राजनीतिक दलहरूले पनि ऐक्यबद्धता जनाएका छन्।

तस्बिर : नेपालप्रेसबाट