दुर्गा सोबले ब्युँताइन् नयाँ शक्ति

काठमाडौं । लामो समयदेखि आन्तरिक मतभेदमा रहेको प्रगतिशील लोकतान्त्रिक पार्टी (प्रलोपा) अन्ततः विभाजनको चरणमा पुगेको छ । पार्टीका दुई अध्यक्ष परिषद् सदस्य दुर्गा सोब र सन्तोष परियारले अब आ–आफ्नै राजनीतिक बाटोमा अघि बढ्ने सहमति गरेका छन् ।

दुवै नेताबीच बिहीबार भएको छलफलपछि छुट्टाछुट्टै दलमार्फत राजनीतिक गतिविधि सञ्चालन गर्ने समझदारी बनेको हो । यससँगै प्रलोपाभित्र देखिएको विवाद औपचारिक रूपमा विभाजनतर्फ उन्मुख भएको छ ।

विवादको मुख्य कारण पार्टीका संरक्षक तथा पूर्वप्रधानमन्त्री बाबुराम भट्टराईलाई अध्यक्ष परिषद् सदस्य सन्तोष परियार पक्षले संरक्षक पदबाट हटाउने निर्णय बनेको थियो। उक्त निर्णयप्रति भट्टराई पक्ष असन्तुष्ट रहँदै आएको थियो ।

यद्यपि परियारले भने भट्टराई आफैं स्वतन्त्र रूपमा राजनीतिक भूमिका निर्वाह गर्न चाहेकाले संरक्षक पदबाट हटाइएको दाबी गर्दै आएका छन् ।

पार्टी विभाजनसँगै बाबुराम भट्टराई निकट अध्यक्ष परिषद् सदस्य दुर्गा सोबले नेपाल समाजवादी पार्टी (नयाँ शक्ति) पुनः ब्युँताउने तयारी गरेकी छन् । अब प्रलोपाका नेता तथा कार्यकर्ता प्रलोपा र नेपाल समाजवादी पार्टी (नयाँ शक्ति) गरी दुई दलमा विभाजित हुने भएका छन् ।