बाढीपहिरोले पृथ्वीराजमार्ग अवरुद्ध

काठमाडौँ । भोटेकोशी बाढी र लगातारको वर्षासँगै खसेका पहिरोका कारण देशका विभिन्न राजमार्ग तथा सडकखण्ड अवरुद्ध भएका छन्। प्रहरीका अनुसार पृथ्वीराजमार्ग, मुग्लिन–नारायणगढ, मेची राजमार्ग, भेरी करिडोर, पासाङल्हामु र शहीद मार्गलगायतका सडकमा यातायात प्रभावित भएको छ।

पृथ्वीराजमार्गको गल्छी–बैरेनी खण्डमा एकतर्फी रूपमा सवारी सञ्चालन भइरहेको छ भने जरिखेतमा थुप्रिएको माटो र ढुंगा हटाएर यातायात सुचारु गरिएको छ। मलेखु–गलौदी खण्डमा करिब ७ सय मिटर लेदो हटाउने काम भइरहेको सडक विभागले जनाएको छ।

धादिङका ज्याङखोला, बिहानी पम्प, गलौदी, जहरेखेत, बाङ्गेमोड र बैरेनी क्षेत्रमा समेत लेदो तथा पहिरो पन्छाउने काम जारी छ। सडक खुलाउन सुरक्षाकर्मी तथा सडक विभागका टोली आवश्यक उपकरणसहित परिचालित छन्।