प्रतिनिधिसभामै ढले कांग्रेस सांसद खड्का, वीर अस्पताल लगियो

काठमाडौं । प्रतिनिधिसभाको बैठक चलिरहेका बेला नेपाली कांग्रेसका सांसद भरतबहादुर खड्का अचानक आफ्नै सिटमा ढलेका छन्। उनलाई थप उपचारका लागि वीर अस्पताल लगिएको छ।

बिहीबारको बैठकमा सांसदहरूले भोटेकोकोशी बाढीपछि जारी खोज, उद्धार तथा राहत व्यवस्थापनबारे सरकारको ध्यानाकर्षण गराइरहेका थिए। सांसद खड्काले पनि उद्धार कार्यलाई प्राथमिकता दिनुपर्ने धारणा राखेका थिए।

राष्ट्रिय प्रजातन्त्र पार्टीका सांसद सोम शर्माले बोलिरहेका बेला खड्का सिटमै ढलेपछि सभामुख डोलप्रसाद अर्यालले शर्मालाई बोल्न रोकेका थिए। त्यसपछि अन्य सांसदहरूले उनलाई सम्हालेका थिए।

संसद् सचिवालयमै स्वास्थ्य परीक्षण गर्दा खड्काको रक्तचाप उच्च देखिएको संसद् सचिवालयका प्रवक्ता एकराम गिरीले जानकारी दिए। उनका अनुसार खड्काको अवस्था सामान्य छ। थप उपचारका लागि उनलाई वीर अस्पताल पठाइएको हो।