पहिरोले चमेलिया नदी आधा थुनियो, सतर्क रहन अनुरोध

दार्चुला । अपिहिमाल गाउँपालिका–१ भट्टारमा गएको पहिरोले चमेलिया नदीको बहाव अवरुद्ध भएको छ। शुक्रबार खसेको पहिरोका कारण नदी करिब आधा थुनिएको जिल्ला प्रशासन कार्यालय दार्चुलाले जनाएको छ।

पहिरो खस्ने क्रम नरोकिएकाले नदी पूर्ण रूपमा थुनिन सक्ने जोखिम रहेको प्रशासनले जनाएको छ। त्यसबाट तल्लो तटीय क्षेत्रमा अचानक बाढी आउन सक्ने सम्भावनालाई मध्यनजर गर्दै स्थानीयलाई उच्च सतर्कता अपनाउन आग्रह गरिएको छ।

प्रशासनले नदी आसपास बसोबास गर्ने नागरिक तथा सम्बन्धित निकायलाई जोखिम कम गर्न आवश्यक सावधानी अपनाउन अनुरोध गरेको छ।