देउवा राहत सामग्रीसहित बाढी प्रभावित नुवाकोटतर्फ

काठमाडौं । पूर्वप्रधानमन्त्री एवं नेपाली कांग्रेसका निवर्तमान सभापति शेरबहादुर देउवा राहत सामग्री लिएर बाढी प्रभावित क्षेत्रको स्थलगत निरीक्षणका लागि बिहीबार बिहान नुवाकोटतर्फ लागेका छन्।

देउवासँग कांग्रेसका अन्य शीर्ष नेताहरू पनि सहभागी छन्। उनीहरू बाढीबाट प्रभावित परिवारका लागि आवश्यक राहत सामग्रीसहित सडकमार्ग हुँदै नुवाकोट पुगेका हुन्।

नुवाकोट पुगेपछि देउवाले कांग्रेस जिल्ला पार्टी कार्यालयमा स्थानीय नेता तथा कार्यकर्तासँग भेट गरी बाढीबाट भएको क्षतिको अवस्थाबारे जानकारी लिने कार्यक्रम छ।

त्यसपछि विदुर नगरपालिका–ढुंगे क्षेत्रमा बाढीले पुर्‍याएको क्षतिको स्थलगत निरीक्षण गर्ने र देवीघाट पुगेर प्रभावित क्षेत्रको अवस्थाबारे जानकारी लिने कार्यक्रम रहेको देउवाको सचिवालयले जनाएको छ।

स्थलगत निरीक्षणपछि देउवा नेतृत्वको टोली बिहीबार नै काठमाडौं फर्किने कार्यक्रम छ।