प्रचण्डले बोलाए कार्यसंयोजन समिति बैठक

काठमाडौं । नेपाली कम्युनिस्ट पार्टी (नेकपा) का संयोजक ‘प्रचण्ड’ले केन्द्रीय संयोजन समितिको बैठक बोलाएका छन्।

भोलि केन्द्रीय कार्यालय पेरिसडाँडामा दिउँसो १ बजे बस्ने बैठकमा अधिवेशन तथा महाधिवेशनको कार्यतालिकामाथि छलफल हुने प्रवक्ता प्रकाश ज्वालाले जानकारी दिएका छन्। बैठकले यस विषयमा आवश्यक निर्णय गर्ने बताइएको छ।

बैठकमा पार्टीको आन्तरिक संगठनसँग सम्बन्धित विषय र राष्ट्रिय राजनीतिका समसामयिक सवालबारे पनि छलफल हुने जनाइएको छ। त्यसैगरी भोटेकोसी बाढीपछि सरकारले गरिरहेको खोजी, उद्धार, राहत तथा पुनःस्थापनाका कामको समेत समीक्षा गरिनेछ।

रसुवा बाढीका कारण नेकपाले यसअघि तय गरेको अधिवेशनसम्बन्धी कार्यतालिका प्रभावित भएको छ। पार्टीले आगामी मंसिर ११ देखि १५ गतेसम्म काठमाडौंमा महाधिवेशन गर्ने निर्णय गरेको थियो। त्यसअघि वडा, पालिका, जिल्ला र प्रदेश तहका अधिवेशन सम्पन्न गर्ने योजना बनाइएको थियो।

तर निर्धारित तालिकाअनुसार संगठनात्मक प्रक्रिया अघि बढ्न नसकेपछि नयाँ कार्यतालिका बनाउने तयारी भइरहेको छ। सदस्यता नवीकरण तथा नयाँ सदस्यता वितरणको कामसमेत प्रभावित भएकाले मंगलबारको बैठकलाई महाधिवेशन तयारीका दृष्टिले महत्वपूर्ण मानिएको छ।