कम्युनिस्ट एकताका लागि नेकपाले बनायो वार्ता समिति

काठमाडौं । नेपाली कम्युनिस्ट पार्टी (नेकपा) ले विभिन्न कम्युनिस्ट घटकसँग पार्टी एकताका लागि छलफल अघि बढाउने भएको छ। त्यसका लागि पार्टीले तीन सदस्यीय वार्ता समिति गठन गरेको छ।

मंगलबार बसेको नेकपाको केन्द्रीय कार्यसंयोजन समितिको बैठकले देव गुरुङ, प्रकाश ज्वाला र गंगानारायण श्रेष्ठ सदस्य रहेको वार्ता समिति गठन गरेको हो।

नेकपाका प्रवक्ता प्रकाश ज्वालाका अनुसार समितिलाई विचार र राजनीतिक दृष्टिकोणमा समानता भएका गणतन्त्रवादी दल तथा समूहसँग एकताका विषयमा संवाद गर्ने जिम्मेवारी दिइएको छ।

उनका अनुसार एउटै कम्युनिस्ट पार्टी निर्माणको उद्देश्यसहित सम्बन्धित पक्षसँग छलफल र वार्तालाई अघि बढाइनेछ। समितिले विभिन्न कम्युनिस्ट समूहसँग सम्भावित सहकार्य तथा एकताका आधारबारे संवाद गर्नेछ।