आज केही स्थानमा वर्षा र हिमपातको सम्भावना

काठमाडौं । नेपालमा हाल मनसुनी र पश्चिमी वायुको प्रभावसँगै भारतको उत्तर प्रदेश आसपास विकसित न्यूनचापीय क्षेत्रको असर देखिएको छ। मौसम पूर्वानुमान महाशाखाका अनुसार मनसुनको न्यूनचापीय रेखा अहिले सरदर स्थानकै आसपास रहेको छ।

हाल कर्णाली र सुदूरपश्चिमसहित देशका अधिकांश हिमाली क्षेत्रमा सामान्य बदली छ। पहाडी क्षेत्रमा आंशिक बदली रहे पनि तराईमा मौसम प्रायः सफा रहेको छ। लुम्बिनी र सुदूरपश्चिमका केही स्थानमा अहिले हल्कादेखि मध्यम वर्षा भइरहेको महाशाखाले जनाएको छ।

सोमबार देशभर आंशिक बदली रहने अनुमान गरिएको छ। हिमाली तथा पहाडी क्षेत्रका केही स्थानमा मेघगर्जन र चट्याङसहित मध्यम वर्षा तथा हिमपातको सम्भावना रहेको छ।

त्यस्तै, सुदूरपश्चिमको तराईका केही स्थान तथा कोशी, मधेस, बागमती, गण्डकी र लुम्बिनी प्रदेशका तराई क्षेत्रमा एक–दुई स्थानमा मेघगर्जन र चट्याङसहित मध्यम वर्षा हुन सक्ने महाशाखाको पूर्वानुमान छ।