धनगढीमा चट्याङ लागेर सात जना घाइते

धनगढी । कैलालीको धनगढी उपमहानगरपालिका–१७ धुर्जन्नामा चट्याङको झिल्का लागेर सात जना घाइते भएका छन्।

स्थानीय खुशिलाल चौधरीको घरको छतमा जन्मदिन मनाइरहेका बेला गएराति नजिकै चट्याङ परेपछि त्यसको झिल्का लागेर उनीहरू घाइते भएको प्रहरीले जनाएको छ।

घाइते हुनेमा ३५ वर्षीया आरती चौधरी, १७ वर्षीया आयुसरा चौधरी, १३ वर्षीया श्रृष्टी चौधरी, ५५ वर्षीया बाग्मती चौधरी, ७ वर्षीय सिसिर चौधरी, १४ वर्षीया रेनुका चौधरी र ३५ वर्षीया जानकी चौधरी छन्।

उनीहरूलाई तत्कालै सेती प्रादेशिक अस्पताल धनगढी लगिएको थियो। जिल्ला प्रहरी कार्यालय कैलालीका अनुसार सबैको अवस्था सामान्य रहेको छ।