दार्चुलाको मार्मामा एनसेलको फोरजी सेवा सुचारू

काठमाडौँ । एनसेलले दार्चुला जिल्लाको मार्मा गाउँपालिकामा नयाँ मोबाइल टावर जडान गरी फोरजी सेवा सुचारू गरेको छ।

नयाँ टावर सञ्चालनसँगै मार्माको लट्टिनाथ क्षेत्रका स्थानीय सञ्चार सेवासँग जोडिएका छन्। साथै अब अपि हिमाल आरोहण तथा उक्त क्षेत्रमा पदयात्रा र अन्य पर्यटकीय गतिविधिमा संलग्न हुने पर्यटकहरूका लागि पनि सञ्चार सेवा उपलब्ध भएको छ।

“यो टावरको जडान र सञ्चालनसँगै हामीले फोरजी सेवाको पहुँच अझै बढाउँदै यसको फाइदा त्यहाँका स्थानीयका साथै पर्यटकहरुलाई दिन सफल भएका छौँ’, एनसेलकी हेड अफ नेटवर्क लेना केसरी कंसाकारले भनिन्, ‘यो हामी आम उपभोक्तालाई सुगमदेखि दुर्गमसम्म सेवा प्रदान गर्न सधैं कटिवद्ध रहेको एक स्पष्ट प्रमाण हो।”

हाल एनसेलले देशभर ४ हजार ५०० भन्दा बढी टावरमार्फत टुजी, थ्रीजी र फोरजी सेवा उपलब्ध गराउँदै आएको छ। कम्पनीले गुणस्तरीय फोरजी सेवा विस्तारलाई प्राथमिकता दिइरहेको अवस्थामा मार्मामा जडान गरिएको यो नयाँ टावरले टुजी र फोरजी प्रविधिमा आधारित दूरसञ्चार सेवा प्रदान गर्ने एनसेलले जनाएको छ।