तार तान्ने क्रममा सशस्त्रका असई महाकालीमा बेपत्ता

कञ्चनपुर । महाकाली नदीमा तार तान्ने क्रममा बोटबाट खसेर सशस्त्र प्रहरी बलका एक सहायक निरीक्षक (असई) बेपत्ता भएका छन्। दोधारा चाँदनीस्थित बीओपी देवीस्थानमा कार्यरत सागर थारु शनिबार बेपत्ता भएका हुन्।

सशस्त्र प्रहरीका अनुसार नेपाल टेलिकमको चुँडिएको तार तान्ने क्रममा उक्त घटना भएको हो। तार तान्न महाकाली नदीमा प्रयोग गरिएको बोटमा ६ जना सशस्त्र प्रहरी र एक जना गरी सात जना सवार थिए। सोही क्रममा असई थारु बोटबाट नदीमा खसेर बेपत्ता भएका हुन्। बोटमा रहेका अन्य छ जना भने सकुशल छन्।

केही दिनअघि महाकाली नदीमाथि दोधारा चाँदनी र भीमदत्त नगरपालिका जोड्ने झोलुङ्गे पुल चुँडिएको थियो। पुल चुँडिएपछि नदीमा लत्रिएको संरचनासँगै दोधारा चाँदनीतर्फ लगिएको इन्टरनेटको तारसमेत चुँडिएको थियो। त्यही तार तान्ने क्रममा असई थारु बेपत्ता भएको प्रहरीले जनाएको छ।

बेपत्ता थारुको खोजी भइरहेको छ।