लोकदोहोरी प्रतिष्ठानको अध्यक्षमा पशुपति शर्मा

काठमाडौं । राष्ट्रिय लोक तथा दोहोरीगीत प्रतिष्ठान नेपालको अध्यक्षमा गायक पशुपति शर्मा निर्वाचित भएका छन्। उनी यसअघि प्रतिष्ठानका वरिष्ठ उपाध्यक्ष थिए।

महासचिवमा शिव हमाल निर्विरोध निर्वाचित भएका छन्। निर्वाचन समितिका संयोजक अधिवक्ता राधाकृष्ण पाठकले यसको जानकारी दिएका हुन्।

बिहीबार बर्दिबास नगरपालिका–३, गौरीडाँडामा मधेस प्रदेशसभाका सभामुख रामअशिष यादवले महाधिवेशन उद्घाटन गरेका थिए। उद्घाटनसत्र सकिएलगत्तै निर्वाचन प्रक्रिया सुरु भएको थियो।

प्रतिष्ठानको केन्द्रीय समिति ७५ सदस्यीय छ। जसमा ३८ पदाधिकारी र ३७ सदस्य रहने व्यवस्था छ।

महाधिवेशनमा सातै प्रदेश, ७० जिल्ला र विदेशस्थित शाखासहित एक सय समितिबाट करिब १ हजार ५०० प्रतिनिधि सहभागी छन्।

अन्य पदको निर्वाचन परिणाम शनिबार महाधिवेशन समापन समारोहमा सार्वजनिक गरिने निर्वाचन समितिले जनाएको छ।