बूढीगण्डकीको बाढीले दुई पुल र घर बगायो, बस्ती जोखिममा

गोरखा । पहिरोले नदी थुनिएपछि आएको बूढीगण्डकीको बाढीले गोरखाका विभिन्न स्थानमा क्षति पुर्‍याएको छ। बाढीले दुईवटा झोलुङ्गे पुल र एउटा फलामे पुल बगाउनुका साथै घर तथा टहरामा क्षति गरेको छ।

जिल्ला प्रहरी कार्यालयका अनुसार चुमनुब्री गाउँपालिका–३ न्याकचेतबाट सिर्दिबास जोड्ने पुरानो झोलुङ्गे पुल र धार्चे गाउँपालिका–५ माछिखोलाबाट केरौजा जोड्ने झोलुङ्गे पुल बाढीले बगाएको छ। आरुघाट गाउँपालिका–२ र ३ जोड्ने सोतीस्थित फलामे पुलसमेत बगाएको प्रहरीले जनाएको छ।

बाढीले सिर्दिबासका रामबहादुर गुरुङको एउटा कच्ची घर बगाएको छ भने अर्को घरमा पानी पसेको छ। धार्चे–५ माछिखोलाको तल्लो बस्तीमा पनि ५ देखि ७ वटा घर र त्यति नै संख्यामा टहरामा बाढी पसेको छ।

धार्चे गाउँपालिका–३ सल्लेरीका २० देखि २२ वटा घरसमेत जोखिममा रहेको प्रहरीले जनाएको छ।