स्थानीयले बनाएको काठे पुल भोटेकोशीले बगायो

रसुवा । भोटेकोशीको बाढीले रसुवाको गोसाइँकुण्ड गाउँपालिका–५ स्याफ्रुबेँसीमा स्थानीयले बनाएको काठे पुलसमेत बगाएको छ। पुल बगेपछि गोसाइँकुण्ड र आमाछोदिङ्मो गाउँपालिकाबीचको आवतजावत ठप्प भएको छ।

गत भदौ १० गतेको बाढीले पक्की पुल बगाएपछि स्थानीयले आफ्नै श्रम र खर्चमा वैकल्पिक काठे पुल बनाएका थिए। शनिबार आएको बाढीले उक्त पुल पनि बगाएको हो।

वैकल्पिक मार्ग नहुँदा दुई गाउँपालिकाबीचको आवतजावतसँगै खाद्यान्न, दैनिक उपभोग्य वस्तु र निर्माण सामग्रीको ढुवानीसमेत प्रभावित भएको छ।