सञ्जालमार्फत भ्रामक सामग्री नफैलाउन युएई नेपाली दूतावासको आग्रह

काठमाडौं : संयुक्त अरब इमिरेट्स (यूएई)स्थित नेपाली दूतावासले त्यहाँ रहेका नेपालीलाई सामाजिक सञ्जालमा भ्रम फैलिने भिडियो र तस्वीर सार्वजनिक नगर्न आग्रह गरेको छ ।

आबुधाबीमा रहेको नेपाली दूतावासले अहिले यूएईमा विकसित परिस्थितिको सन्दर्भमा सूचनामार्फत सामाजिक सञ्जाल प्लेटफर्म वा अन्य कुनै माध्यमबाट हल्ला तथा आधिकारिक रूपमा पुष्टि नभएका सामग्री प्रकाशन वा प्रसारण नगर्न र सुरक्षा स्थितिबारे भ्रम फैलिने मनसायको सन्देश प्रवाह नगर्न सचेत गराएको छ ।

यूएईमा रहेका सबै नेपालीलाई त्यहाँको कानून पालना गर्न र त्यस विपरीत कार्य भएमा कानूनबमोजिम दण्डनीय हुने चेतावनी यूएईका आधिकारिक निकायबाट जारी भएको दूतावासले जारी गरेको सूचनामा उल्लेख छ ।‘दुबई प्रहरीले विमानस्थल र दुबई क्षेत्रका कुनै पनि भिडियो खिचेर सामाजिक सञ्जालमा पोस्ट नगर्न, गरेको भए हटाउन भनेको छ । यस्ता क्रियाकलाप नरोकिए डिपोर्टसम्मको कारबाही गर्न बाध्य हुने त्यहाँको प्रहरीले चेतावनी दिएको छ’ सूचनामा भनिएको छ ।