भोटेकोशी बाढी प्रभावित बालबालिकाका लागि चीनले दियो १ करोड १० लाख सहयोग

काठमाडौं । भोटेकोशी नदीमा आएको विनाशकारी बाढीबाट प्रभावित बालबालिकाको सहयोगका लागि चीन सरकारले नेपाललाई १ करोड १० लाख रुपैयाँ प्रदान गरेको छ।

नेपालका लागि चिनियाँ राजदूत चाङ माओमिङले सोमबार शिक्षा तथा खेलकुदमन्त्री सस्मित पोखरेललाई मन्त्रालयमै पुगेर सहयोग रकमको चेक हस्तान्तरण गरेका हुन्।

चेक बुझ्दै मन्त्री पोखरेलले विपत्तिको कठिन समयमा चीनले गरेको सहयोगप्रति आभार व्यक्त गरे। उनले आगामी दिनमा पनि नेपाल–चीनबीच आवश्यक समन्वय र सहकार्य निरन्तर रहने विश्वास व्यक्त गरे।

राजदूत चाङले नेपाललाई आइपर्ने सुख–दुःखमा चीन सधैँ साथमा रहने प्रतिबद्धता जनाए। उनले बाढीका कारण प्रभावित बालबालिकालाई प्रत्यक्ष लाभ पुग्ने उद्देश्यले सहयोग रकम उपलब्ध गराइएको बताए।