राजावादीको गतिविधिपछि प्रधानमन्त्रीले खोजे माओवादीको साथ : हिमाल शर्मा

काठमाडौं । नेकपा माओवादी केन्द्र नेता शिमाल शर्माले राजावादीको गतिविधिपछि प्रधानमन्त्री केपी शर्मा ओलीले माओवादी साथ खोजेको बताएका छन् ।
प्रधानमन्त्रीले साथ खोजेपछि काठमाडौं केन्द्रित हुने गरी पार्टीका जारी ‘तराई–मधेश जागरण अभियान’ केही समयका लागि स्थगित गरिएको उनले बताए ।

‘प्रधानमन्त्रीसँग अध्यक्ष प्रचण्डको संवाद भयो । संवादमा ठ्याक्कै कुरा के भयो भन्ने भन्दा पनि उहाँले राजावादीको गतिविधिबारे अवगत गराउनुभयो । यो व्यवस्थाको, गणतन्त्रको माया त माओवादीलाई छ’ अभियान स्थगित हुनुको कारणबारे शर्माले भने ।

यही फागुन १२ गते झापाको कचनकवलबाट सुरु भएको अभियान शनिबार माओवादीले स्थगित गरेको छ । राजावादीको गतिविधि मत्थर पार्ने नीति अन्तर्गत अभियान स्थगित गरिएको नेताहरू बताउँछन् ।

शर्मा भन्छन्, ‘माओवादी तराइ मधेशतिर हुने । यता काठमाडौंमा राजवादीहरू सडकमा देखिने र सरकार यस्तो बेला कमजोर रहेको भान हुने कुरा सैह्य भएन ।’

सरकारले प्रभावकारी काम गर्न नसक्दा जनतामा निराशा रहेको र यसको जिम्मेवार सरकार नै भएको शर्मा बताउँछ्न । तर, गणतन्त्रको विषयमा त ठूला दलहरू एक ठाउँमा छन् । गणतन्त्रकै विषयमा अनावश्यक गतिविधि हुन्छन् भने त्यसको प्रतिकारमा उत्रन माओवादी तयार रहेको शर्माले बताए ।