शक्तिशाली आँधीपछि अमेरिकाको उत्तरपूर्वी क्षेत्रमा बाढी

अमेरिका । शक्तिशाली आँधीसँगै परेको भारी वर्षाले अमेरिकाको उत्तरपूर्वी क्षेत्रमा जनजीवन प्रभावित भएको छ । तटीय क्षेत्रका बस्तीमा बाढी पसेको छ भने तीव्र हावाका कारण विद्युत् र यातायात सेवा अवरुद्ध भएका छन् ।

अमेरिकाको राष्ट्रिय मौसम सेवाका अनुसार न्युयोर्क सहर, बोस्टनलगायत क्षेत्रमा शनिबार भारी वर्षासँगै तीव्र हावा चलेको थियो । जोखिम बढेपछि न्युयोर्क र न्युजर्सीमा आपत्कालीन अवस्था घोषणा गरिएको छ ।

बीबीसीका अनुसार दुवै राज्यका केही तटीय क्षेत्रमा अझै बाढीको अवस्था छ । भर्जिनियादेखि मेनसम्म थप वर्षा र शक्तिशाली आँधीको सम्भावना रहेकाले सतर्कता अपनाइएको छ ।

न्युजर्सीको सर्फ सिटीमा बाढीले सडक डुबाएपछि स्थानीय बासिन्दा पानीमै हिँड्न बाध्य भएका तस्बिर सार्वजनिक भएका छन् ।