विपद्ले चीनमा पनि पुर्‍यायो ठूलो क्षति

काठमाडौं । नेपाल–चीन सीमाक्षेत्रमा  भदौ १० गते आएको विनाशकारी बाढी तथा गेग्रानसहितको पहिरोपछि चीनतर्फको ग्यिरोङ पोर्टमा पनि क्षती भएको छ ।

नेपालस्थित चिनियाँ राजदूतावासले ३१ मिनेट अघि आफ्नो आधिकारिक फेसबुक पेजमार्फत ‘Gyirong Port: Before and After the Disaster’ शीर्षकमा दुई तस्बिर सार्वजनिक गरेको हो। तस्बिरमा विपद्अघि र विपद्पछिको ग्यिरोङ पोर्ट क्षेत्रको अवस्थालाई तुलनात्मक रूपमा देखाइएको छ।

दूतावासले सार्वजनिक गरेको पहिलो तस्बिर भदौ १० को हो भने दोस्रो तस्बिर भदौ ११ को रहेको छ। दुवै तस्बिरमा चीन र नेपालतर्फको भूभाग तथा ग्यिरोङ पोर्ट क्षेत्रलाई चिनाइएको छ।

तस्बिरमा विपद्अघि हरियालीसहित सडक तथा विभिन्न संरचना देखिने क्षेत्र बाढी र पहिरोपछि ठूलो मात्रामा माटो, ढुंगा तथा गेग्रानले पुरिएको देखिन्छ। पोर्ट आसपासको भू–दृश्यमै व्यापक परिवर्तन आएको तस्बिरले देखाउँछ।

गत भदौ १० मा नेपाल–चीन सीमाक्षेत्रमा आएको शक्तिशाली बाढी तथा पहिरोले रसुवाको ल्हेन्दे खोलादेखि चीनको ग्यिरोङ पोर्टसम्म ठूलो क्षति पुर्‍याएको थियो। घटनाका कारण सडक, पुल, सञ्चार तथा अन्य पूर्वाधारमा क्षति पुगेपछि सीमाक्षेत्रमा उद्धार तथा खोजी कार्य सञ्चालन गरिएको थियो।

चिनियाँ दूतावासले सार्वजनिक गरेको ‘पहिले र पछि’को तस्बिरले उक्त विपद्ले ग्यिरोङ पोर्ट क्षेत्रमा पारेको भौतिक क्षतिको भयावह दृश्य स्पष्ट पारेको छ।