बागमतीका मुख्यमन्त्रीले पाए विश्वासको मत

काठमाडौं । बागमती प्रदेशका मुख्यमन्त्री किरण थापा मगरले प्रदेशसभाबाट सर्वसम्मत रूपमा विश्वासको मत प्राप्त गरेका छन् ।

मंगलबार बसेको प्रदेशसभा बैठकमा मुख्यमन्त्री थापा मगरले विश्वासको मत लिएका हुन्। मतदानमा उपस्थित सबै ५७ जना सांसदले उनको पक्षमा मत दिएका छन् भने विपक्षमा कुनै मत परेको छैन।

उपसभामुख अप्सरा चापागाईंले मुख्यमन्त्री थापा मगरले विश्वासको मत प्राप्त गरेको घोषणा गर्दै पक्षमा ५७ र विपक्षमा शून्य मत परेको जानकारी दिइन्। प्रदेश सरकार टिकाउन आवश्यक ५३ मतभन्दा बढी समर्थन मुख्यमन्त्री थापाले प्राप्त गरेका हुन्।

थापालाई नेपाली कम्युनिस्ट पार्टी (नेकपा), नेकपा एमाले तथा राष्ट्रिय प्रजातन्त्र पार्टी (राप्रपा)का सांसदहरूले समर्थन गरेका छन्। राप्रपाका उद्धव थापा, राजु विष्ट, गिरबहादुर तामाङ, राजेन्द्र प्रजापति, डम्बर तामाङ, नुरज बज्राचार्य र मोनिका श्रेष्ठले विश्वासको मत दिएका थिए।

यता विपक्षी नेपाली कांग्रेसका ३६, नेपाल मजदुर किसान पार्टीका ३ तथा हानेपाका २ सांसदले बैठक बहिष्कार गरेका कारण मतदानमा सहभागी भएनन्। सरकार साझेदार दल राप्रपाका पाँच सांसद पनि बैठकमा अनुपस्थित रहेका थिए।

प्रदेशसभामा उपस्थित सबै सांसदको समर्थन पाएसँगै मुख्यमन्त्री किरण थापा मगरले बागमती प्रदेश सरकारका लागि बलियो संसदीय समर्थन हासिल गरेका छन्।