संसद्को चालु अधिवेशनको अन्तिम बैठक आज

काठमाडौं । संघीय संसद्का दुवै सदनको चालु अधिवेशनको अन्तिम बैठक आज बस्दैछ। सरकारको सिफारिसमा राष्ट्रपति रामचन्द्र पौडेलले असोज १६ गते राति १२ बजेदेखि अधिवेशन अन्त्य हुने घोषणा गरिसकेका छन्।

प्रतिनिधिसभाको बैठक आज शुक्रबार बिहान ११ बजे सिंहदरबारमा बस्नेछ। बैठकमा प्रस्तुत हुन नसकेका मौखिक तथा लिखित प्रश्नका उत्तर सम्बन्धित मन्त्रीले टेबुल गर्नेछन्।

त्यस्तै, विभिन्न विधेयकलाई दफावार छलफलका लागि सम्बन्धित समितिमा पठाउने प्रस्ताव पेस हुने कार्यसूची छ। ‘संवैधानिक निकायका पदाधिकारीहरूको पारिश्रमिक, सेवाको शर्त र सुविधासम्बन्धी पहिलो संशोधन विधेयक, २०८३’ पारित गर्ने कार्यक्रमसमेत रहेको छ।

सभामुख डोलप्रसाद अर्यालले १० वा सोभन्दा बढी बैठकमा अनुपस्थित सांसदको सूचना स्वीकृतिका लागि पेस गर्नेछन्। राष्ट्रपतिबाट प्राप्त पत्र पढेर सुनाउने कार्यक्रम पनि छ।

राष्ट्रियसभाको बैठक दिउँसो १ः१५ बजे बस्नेछ। बैठकमा प्रतिनिधिसभाबाट संशोधनसहित फिर्ता आएको ‘राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१’ माथिको संशोधनमा सहमति जनाउने प्रस्ताव पेस हुनेछ।

यसैगरी, ‘आन्तरिक वायु सेवाको दायित्वसम्बन्धी विधेयक, २०८३’ पारित गर्ने कार्यसूची रहेको छ। आजको बैठकसँगै संसद्को चालु अधिवेशन अन्त्य हुनेछ।