भोटेकोशी बाढीबारे राष्ट्रिय सभाबाट विशेष प्रस्ताव पारित

काठमाडौं । राष्ट्रिय सभाबाट भोटेकोशी बाढीबारे विशेष प्रस्ताव पारित भएको छ ।

मंगलबार बसेको राष्ट्रिय सभामा अध्यक्ष नारायण प्रसाद दाहालले विशेष प्रस्ताव प्रस्तुत गरेका हुन्, जसलाई सभाले सर्वसम्मत रूपमा पारित गरेको छ ।

भदौ १० गते रसुवाको भोटेकोशी विनाशकारी बाढीका कारण ठूलो धनजनको क्षति भएको छ । बाढीमा परेर ज्यान गुमाएकाहरूप्रति राष्ट्रिय सभाले श्रद्धाञ्जलि अर्पण गरेको छ । शोकसन्तप्त परिवारजन, आफन्त तथा सम्बन्धित राष्ट्र र समुदायप्रति गहिरो समवेदना व्यक्त गरिएको छ ।

विशेष प्रस्तावमार्फत राष्ट्रिय सभाले बाढी प्रभावितको उद्धार र राहतको विषयलाई प्राथमिकतामा राख्न सरकारको ध्यानाकर्षण गरेको छ । घाइतेहरूको निशुस्ल्क उपचार गराउन आग्रह गरिएको छ ।

भौतिक संरचनाको पुनर्निर्माणका लागि तहगत सरकारहरूबिच समन्वय गर्न आग्रह गरिएको छ । स्थानीय समुदाय, नागरिक समाज, विकास साझेदार तथा अन्तराष्ट्रियलाई सहयोगका लागि अपिल गरिएको छ ।

विपद्को समयमा राष्ट्रिय एकता कायम गर्न र भविष्यमा आउन सक्ने यस्ता विपद्को पूर्वतयारीको काम अघि बढाउन आग्रह गरिएको छ ।