दुई महिना बित्दा पनि आएन सुदूरपश्चिमको बजेट

धनगढी । सुदूरपश्चिम प्रदेश सरकार गठन भएको दुई महिना बितिसक्दा पनि चालु आर्थिक वर्षको बजेट प्रदेशसभामा पेस हुन सकेको छैन। मुख्यमन्त्री खगराज भट्टले भदौभित्रै ‘फास्ट ट्र्याक’बाट बजेट ल्याउने बताउँदै आए पनि भदौको अन्तिम दिनसम्म प्रक्रिया अघि बढ्न सकेन।

बजेट नहुँदा प्रदेशका मुख्यमन्त्री, मन्त्री र कर्मचारीले तलबभत्ता पाएका छैनन् भने औषधि खरिद तथा विकास योजनाका कामसमेत प्रभावित भएका छन्। प्रदेश नीति तथा योजना आयोगका अनुसार मन्त्रालयहरूले पुराना कार्यक्रम परिमार्जन गरिरहेकाले बजेट प्रदेशसभामा पुग्न अझै करिब एक साता लाग्न सक्छ।

यसअघि १ असारमा पेस गरिएको ३७ अर्ब ७० करोड रुपैयाँभन्दा बढीको बजेट विवादपछि फिर्ता लिएर नयाँ सरकारले पुनर्लेखन गर्ने जनाएको छ। गत आर्थिक वर्षको बचत अनुमानभन्दा कम भएपछि नयाँ बजेटको आकार करिब ३२ अर्ब रुपैयाँ आसपास रहने बताइएको छ।