बागलुङमा पहिरोमा परी मृत्यु हुनेको संख्या १३ पुग्यो

बागलुङ । असोज ९ देखि ११ गतेसम्म परेको लगातार वर्षापछि गएको पहिरोमा परी बागलुङमा मृत्यु हुनेको संख्या १३ पुगेको छ।

असोज ११ गते पहिरोमा परेर बेपत्ता भएकी तमानखोला गाउँपालिका–४ सन्तरकी ५३ वर्षीया पुनसरा विकको शव बुधबार फेला परेको जिल्ला प्रहरी कार्यालय बागलुङले जनाएको छ।

प्रहरीका अनुसार पहिरोले घर पुरिँदा निसीखोला गाउँपालिकामा पाँच, तमानखोलामा पाँच र ताराखोला गाउँपालिकामा तीन जनाको ज्यान गएको छ।

तमानखोलामा मृत्यु हुनेमा बुद्धिराज घर्ती, भीमदेवी घर्ती, हस्तवीर श्रीपाली र उडिसरा श्रीपाली रहेका छन्। प्रहरीले घटनाबारे थप विवरण संकलन भइरहेको जनाएको छ।