हिम्लुङ हिमपहिरोमा हराएका १४ जना अझै सम्पर्कविहीन

काठमाडौं । मनाङको हिम्लुङ हिमालमा हिमपहिरोमा परेर सम्पर्कविहीन भएकाहरूको खोजी कार्य तीव्र पारिएको छ।

सोमबार बिहानैदेखि हेलिकप्टरमार्फत तीन जनाको टोली परिचालन गरी खोजी भइरहेको मनाङका सहायक प्रमुख जिल्ला अधिकारी कृष्णप्रसाद पौडेलले जानकारी दिए।

आइतबार ७ हजार १२६ मिटर अग्लो हिम्लुङ हिमालमा हिमपहिरो खस्दा २७ जना सम्पर्कविहीन भएका थिए। तीमध्ये ११ जना आफैँ हिँडेर फुँ गाउँ आइपुगेपछि सम्पर्कमा आएका छन्। घटनास्थलबाट दुई जनाको शवसमेत फेला परेको छ।

हाल १४ जना अझै सम्पर्कविहीन रहेको र उनीहरूको खोजी भइरहेको पौडेलले बताए। फेला परेका शव काठमाडौं पठाउने तयारी भइरहेको छ।

खोजीका लागि अनुभवी गाइडहरू परिचालन गरिएको र मौसमसमेत खुलेका कारण अभियानमा सहजता हुने अपेक्षा गरिएको उनले बताए।