खाना पकाउने ग्यासको आपूर्ति गर्ने जिम्मेवारी सरकारकै हो : नृप वड

काठमाडौं । धनगढी उप-महानगरपालिकाका निवर्तमान नगर प्रमुख नृप वडले नेपालमा खाना पकाउने ग्यासको नियमित आपूर्ति सुनिश्चित गर्न सरकारले दीर्घकालीन र प्रभावकारी योजना बनाउनुपर्ने बताएका छन्।

नेपाली कांग्रेसका प्रभावशाली नेता समेत रहेका वडले ग्यासको अभावलाई सामान्य बजार समस्या मात्र नभई उपभोक्ता अधिकार, आपूर्ति व्यवस्थापन र सरकारी जवाफदेहितासँग जोडिएको विषयका रूपमा लिनुपर्ने बताएका छन्। उनका अनुसार माग–आपूर्तिको वैज्ञानिक अध्ययन, पर्याप्त बफर स्टक, वैकल्पिक आयात स्रोत, पारदर्शी वितरण र नियमित बजार अनुगमन आवश्यक छ।

कृत्रिम अभाव तथा कालोबजारी नियन्त्रण गर्न कडा अनुगमन र कारबाही गर्नुपर्नेमा जोड दिँदै उनले संकट आएपछि मात्रै सक्रिय हुनेभन्दा अभाव हुनुअघि नै सरकारले तयारी गर्नुपर्ने बताए। साथै संघ, प्रदेश र स्थानीय तह तथा निजी क्षेत्रबीच प्रभावकारी समन्वय आवश्यक रहेको उनको भनाइ छ।

दीर्घकालीन रूपमा खाना पकाउने ग्यासमाथिको निर्भरता घटाउन विद्युतीय चुलो र स्वदेशी विद्युत्को प्रयोग बढाउनुपर्ने सुझाव दिँदै वडले “सरकारको सफलता कति बैठक भयो भन्नेले होइन, कति घरको चुलो नियमित रूपमा बल्यो भन्नेले मापन हुनुपर्छ” भनेका छन्।