बेत्रावतीमा बाढीले पुरिएको घरबाट २३ शव फेला

काठमाडौं । नुवाकोटको विदुर नगरपालिका–१० बेत्रावतीमा भोटेकोशीको बाढीले पुरिएको एक घरबाट २३ जनाको शव फेला परेको छ।

खोज तथा उद्धारका क्रममा मंगलबार एउटै घरको एक कोठाबाट २१ वटा शव निकालिएको र घरको बाहिरी भागबाट थप दुई शव भेटिएको उद्धारमा खटिएका एक प्रहरी अधिकारीले जानकारी दिएका छन्।

गत बुधबार भोटेकोशी हुँदै त्रिशूली नदीमा आएको भीषण बाढीले उक्त तीनतले घर पुरेको थियो। बाढीबाट बच्न घरको माथिल्लो तलामा पुगेका मानिसहरू समेत बाढीको चपेटामा परेको हुनसक्ने प्रहरीको प्रारम्भिक अनुमान छ।

फेला परेका शवहरूको हालसम्म पहिचान हुन सकेको छैन। उनीहरूमध्ये केही तीर्थयात्री हुनसक्ने आशंका गरिएको प्रहरीले जनाएको छ।

घटनास्थलमा थप खोज तथा उद्धार कार्य जारी रहेको छ।