‘त्यो बाढी थिएन, सुनामी थियो’

धनगढी । रसुवाको भोटेकोसीमा आएको विनाशकारी बाढीबाट ज्यान जोगिएका माथिल्लो त्रिशूली–१ जलविद्युत् आयोजनाका लोडर चालक भीम साउदले आफूले बाढीलाई ‘साक्षात् सुनामी’ जस्तो देखेको बताएका छन् । गत बुधबार बिहान बाढीको साइरन बजेपछि भाग्न थालेका साउँदले भोटेकोसीबाट कालो मुस्लोसहितको लेदो केही क्षणमै आफूहरूतर्फ आएको बताए ।

‘पछाडि फर्केर हेर्दा अब बाँचिँदैन भन्ने लाग्यो,’ कैलालीका साउदले भने, ‘तर भिरतिर चढ्न थालेँ । केही पाइला मात्रै ढिलो भएको भए म पनि बाढीमा परिसकेको हुन्थेँ ।’

साउदका अनुसार आयोजनाका सुरुङ तथा तल्लो क्षेत्रमा रहेका धेरै कामदारहरु भाग्नै पाएनन् । उनका अनुसार आयोजनामा अझै दुई सयभन्दा बढी कामदार सम्पर्कविहीन छन् ।

उद्धार प्रयास प्रभावकारी हुन नसकेको गुनासो गर्दै उनले भने, ‘समयमै प्रभावकारी उद्धार भएको भए केही ज्यान बचाउन सकिन्थ्यो ।’ बाढीबाट बचेका साउँद केही दिन धुन्चेमा बसेपछि पैदल र बसमार्फत काठमाडौं आइपुगेका हुन् ।

‘यो बाढी थिएन, साक्षात् महाकाल थियो,’ उनले भने, ‘त्यसको लपेटाबाट बाँच्नु भनेको महाकाललाई जित्नुजस्तै हो ।’