सञ्जयले भने-अरूको ज्यान जोगाउँदा सुरुङभित्र फसेँ

काठमाडौं । माथिल्लो त्रिशूली–३ ‘ए’ जलविद्युत् आयोजनाको सुरुङबाट नौ दिनपछि उद्धार भएका सञ्जय साह अरूलाई बचाउने क्रममा आफैं सुरुङभित्र फसेका थिए।

आयोजनाको कन्ट्रोल रुममा अपरेटर रहेका साहले बाढी आएपछि आफू बाहिर निस्कनुभन्दा पहिले त्यहाँ रहेका ४०–४५ जनालाई सुरक्षित स्थानतर्फ पठाएका थिए। अरूलाई बाहिर निकाल्ने क्रममा समय लागेपछि उनी सुरुङमै थुनिएका हुन्।

सुरुङभित्र रहँदा अन्य व्यक्तिको कुराकानीसमेत सुनेको र पावर हाउसमा पनि मानिस फसेको हुनसक्ने साहले बताएका छन्। नौ दिनसम्म सुरुङभित्र उनले महामन्त्र जप्दै समय बिताएको जनाएका छन्।

शुक्रबार नेपाली सेनाको उद्धार टोलीले साहसँगै कविर महर्जनलाई पनि जीवितै बाहिर निकालेको थियो।