‘प्रेम आले’लाई जिताउन मगर समुदाय एकजुट

धनगढी । कैलाली क्षेत्र नं. ५ का प्रतिनिधिसभा सदस्य पदका उम्मेदवार प्रेम बहादुर आलेलाई जिताउने उद्देश्यसहित मगर समुदाय एकजुट भएका छन् ।

विभिन्न ठाउँमा आयोजित भेटघाट, टाेलसभा, घरदैलो भेटघाट र सामूहिक कार्यक्रममा मगर समुदायका अगुवा तथा स्थानीयहरू खुलेर समर्थन जनाउँदै सक्रिय रूपमा चुनावी अभियानमा सहभागी भएका छन् ।

मगर समुदायको संगठित साथ र उत्साहजनक सहभागिताले प्रेम आलेको चुनावी अभियान थप बलियो बन्दै गएको छ ।

यसैक्रममा नेपाल मगर संघद्वारा आज शनिबार धनगढी उप-महानगरपालिका- १७, दिपनगरमा आयोजना गरिएको “माघि मिलन कार्यक्रम” मा प्रेम आले प्रमुख अतिथिका रूपमा सहभागी भएका थिए ।

माघि मिलन कार्यक्रमको उद्घाटन गर्दै आलेले नेपाली कम्युनिस्ट पार्टीका अध्यक्ष पुष्पकमल दाहाल ‘प्रचण्ड’को आग्रहमा यस क्षेत्रबाट प्रत्यक्ष निर्वाचन लडिरहेको बताए ।

उनले मगर समुदायको छोरो संसदमा पुगेपछि सिंगो मगर समुदायको शिर निहुरिन नदिने प्रतिबद्धता जनाउँदै मगर समुदायको हक–अधिकार, पहिचान र सम्मानका लागि सदैव आवाज उठाउने विश्वास दिलाए ।

कार्यक्रममा सहभागी मगर समुदायका अगुवा तथा स्थानीयहरूले प्रेम आलेलाई अत्यधिक मतले विजयी गराउने प्रतिबद्धता व्यक्त गरेका छन् ।